Европското фудбалско првенство во Германија е пред самата завршница, финалето. Таму има и многу наши Македонци, прилепчани. Синоќа ни се јави човекот кој цел живот е врзан за фудбалот, големиот навивач на Победа Јовица Релушкоски. Се интересиравме дали можеби за полуфиналето успеа да влезе во еден од стадионите.
– Тешко е до карта во оваа фаза. Нема ниту за нивните, мислам на Англичаниве или Холанѓаниве. По некоја карта на црно излегува, но се екстра-скапи, по 400, 500, 600 евра.
Релушкоски е во Келн, каде ги гледаше од трибина натпреварите што се одиграа. Таму сите се под фудбалска „хипноза“.
– Градов пулсира цел месец со фудбалов. Полно е со штандови, бимови за гледање и ТВ-екрани. Имаше многу убави фан-зони. Доминираа Шкотланѓаните и Англичаните, но добри беа и Швајцарците, па и Словенците. А Германциве кога играа на кој било стадион, градов беше безмалку блокиран, особено центарот. На стадион 50.000 гледачи, а на плоштадите уште по 10.000 народ на секоја репрезентација, плус неутралните….. Убавина.
Навивачи едни покрај други, а расправии, кавги?
– И што ми остави добар впечаток од сите табори имаше заеднички фотки, заедно пиеја, се пееше, а не видов ниеден инцидент некој да се „скачкаа“ помеѓу себе.
Јовица не бил сам на натпреварите, надвор и внатре во стадионот.
– Да си ја пофалам и Анета сопругава. Ми правеше друштво на спортскиве терени. Поздрав од Келн и од Германија, со надеж дека на следното Европско ќе ја бодриме Македонија. Победа вечна! – порача Јовица Релушкоски.
