Есенва меѓу стативите го нема голманот Дарко Тофилоски. Последен клуб му беше Беса со која го освои првото место во Втората лига и пласманот во Првата лига. Има 38 години и уште може успешно да брани, но конечната одлука ја нема соопштено за јавноста.
Потсетуваме, неговата кариера е пребогата и долга веќе 20 години. Според нашата евиденција, првпат на тренинзите од првиот тим на Победа беше присутен на своите 15 години, а првиот официјален настап за сениорскиот тим на Победа за реванш-полуфиналниот куп-меч во Кичево Напредок – Победа 1:0 на 15 април 2004 година, кога Тофилоски имаше 18 години.
Натаму важните настапи одеа по следниот редослед: на 26 јуни 2004 година во Ивањица, Србија, Црвена звезда (Белград) – Победа 2:0 на првиот пријателски меѓународен дуел; на 8 август 2004 во Прилеп, Победа – Силекс 1:0 на првиот првенствен прволигашки меч; на 19 јуни 2005 во Смедерево, Смедерево – Победа 0:1 на првиот меч во европскиот куп Интертото; по што следеа уште три тоа лето – реванш со Смедерево во Скопје 2:1, во Хамбург со Хамбургер (4:1 за Хамбургер) со рекорд во историјата на Победа од 27.612 гледачи и во Скопје со Хамбургер (1:4).
Освен за Победа (Прилеп) и Беса (Добри Дол, Гостиварско), бранеше за: Тиквеш (Кавадарци), Трепча Косовска Митровица (Косово), Дрита Гњилане (Косово), Алашкерт (Ерменија), Дунајска Стреда (Словачка), Ружомберок (Словачка), Кошице (Словачка) и Шафхаузен (Швајцарија).
Последниот меч му беше на 11 мај во Врапчиште, Беса – Башкими 0:0.
