Голема драма се случи денеска во Прилеп на мечот Победа – Кожуф. По првото полувреме се доби впечаток дека прилепскиот тим е поблиску до победата, по неколку неискористени шанси. Меѓутоа, во вториот дел се случи изненадување за публиката на Градскиот стадион „Гоце Делчев“. Прво во 63. минута со силен удар во аголот гол постигна Сашо Дуков, а пет минути подоцна, во 68. минута домашната мрежа ја затресе и Петар Гугуљанов. Резултатот беше 0:2, водство на Кожуф.
Победа не се предаде и атакуваше кон гостинскиот гол. Во 80. минута убав гол, со силен удар од далечина, од место надвор од шеснаесетникот, постигна Јасин Казимоски за намалување на 1:2 и возбудувањата се вратија на мечот. Кулминација беше 95. минута. Тогаш Аврам Боев имаше старт врз Јусуф Каба кој падна во гостинскиот шеснаесетник, па судијата досуди пенал за Победа. Од белата точка шутираше Филип Димоски, топката помина крај левиот дирек и резултатот остана непроменет, 1:2.
ПОБЕДА: И. Николоски, М. Талески, Ивчески, Казимоски (93. Крајоски), Исмаил (71. А. Петрески), Арифи, Ф. Димоски, Љумовиќ (71. Д. Н. Паскоски), Кофиловски, Каба, Богевски. Тренер: Стојанче Дунимаглоски.
КОЖУФ: Картов, Петров (46. А. Боев), Гугуљанов, Бошески (46. Б. Боев), Дуков, Папули, Сарески (73. Чурлинов), Стојанов (84. Дуев), Ѓорѓиевски (55. Стојков), Љушев, Стојков. Тренер: Трајче Ников.
РЕЗУЛТАТИ 29. КОЛО: Победа – Кожуф 1:2, Вардарски – Вардар Н. 0:3, Саса – Осогово 1:0, Новаци – Скопје 4:0, Башкими – Детонит 3:2, Охрид – Брегалница 0:1, Беласица – Борец 1:1, Арсими – Македонија ЃП 0:0.
ТАБЕЛА: Македонија ЃП 64, Башкими 63, Арсими 62, Брегалница 58, Детонит 43, Саса и Охрид 42, Беласица 40, Кожуф и Скопје 36, Новаци 35, Вардар Н. 33, Победа 32, Осогово 26, Борец 14, Вардарски 11.
ПОСЛЕДНО 30. КОЛО (17 мај во 17 часот): Детонит – Победа, Вардар Н. – Арсими, Македонија ЃП – Беласица, Борец – Охрид, Брегалница – Башкими, Кожуф – Новаци, Скопје – Саса, Осогово – Вардарски.
НОВА ГРУПА НАВИВАЧИ НА ПОБЕДА!
На прилепскиот стадион денеска имаше нови навивачи на Победа. Тоа беше група од мали деца, ученици до 4 одделение. Дознаваме дека биле од Основното училиште „Кочо Рацин“, од Урбаната заедница „Рид“.
Стремежот е од меч во меч да има се поголем број гледачи, да е се пополн стадионот во Прилеп.
