Заврши третото издание на Меѓународниот меморијален пингпонгарски турнир „Илија Карески – Каре“, во чест и спомен на големиот пингпонгар, тренер и спортски работник. Вчера и денеска во салата од ООУ „Добре Јованоски“ во Прилеп имаше учество на 132 пингпонгари и пингпонгарки од седум држави. Бугарија беше застапена со 1 клуб, а останатите со повеќе, Црна Гора и Србија со по 2, Грција и Косово со по 3, Албанија со 4, Македонија со 16 клуба.
Најдобрите добија медали, пехари и парични награди. Паричниот фонд е 550 евра. На десетте маси беа мошне интересни натпревари во повеќе возрасни категории: сениорска, младинска (до 19 години), кадетска (до 13 и до 15 години) и ветеранска (од 40 до 49, од 50 до 64 и над 65 години) .
Кај сениорките редоследот на најдобрите е: 1. Амелија Уце – Николов (Шампион ФА, Штип), 2. Матеја Смолиќ (Рисови, Скопје), 3. Софија Хасану и Емилија Марковска (Младост, Прилеп). Кај сениорите најуспешни беа: 1. Филип Младеновски (Шампион ФА, Штип), 2. Антонио Стомнароски (Младост 96, Прилеп), 3. Кејди Калаја (Албанија) и Сашко Богатинов (Шампион ФА, Штип).
На настанот присуствуваа и го отворија д-р Борче Јовчески – градоначалникот на Прилеп и Дејан Проданоски – претседателот на Советот на Општината, додека наградите ги доделија Марјан Матракоски – претседателот на ППК Младост 96, Златко Рикалоски – потпретседателот на ПФМ и Вера Кареска – сопруга на починатиот Илија Карески – Каре.
Одличен организатор беше клубот Младост 96.
