Веќе објавивме дека Мега баскет со 72:61 го совлада тимот МЗТ Уни банка. Но во салата на ООУ „Добре Јованоски“ во Прилеп се случи и нешто несекејдневно – играч постигна две „тројки“ од огромна далечина, од близу 25 метри. Со шут од пред сопствениот кош го погоди противничкиот. Ова му успеа на 19-годишниот Бојан Стојановски, член на МЗТ Уни банка. Сите се фаќаа за глава – и домашните и гостите и публиката.
– Претходно имам постигнато неколку „тројки“ од половина терен, но од ваква далечина, а и двапати на ист меч како синоќа во Прилеп, ми се нема случено. Ретко е ова. Не секој добива шанса двапати да шутне на истекот на времето, а не пак двапати да погоди – вели Бојан Стојановски.
Тој синоќа беше најефикасен за МЗТ Уни банка – со четири „тројки“ и вкупно 17 поени.
