Интересен дуел беше Победа – Осогово пред публиката на Градскиот стадион „Гоце Делчев“ во Прилеп, во рамките на 27. коло од Втората лига. Резултатот е 0:0, наспроти очекувањата за нови три бода за домашниот тим. Меѓутоа, кочанската екипа со борбена игра успеа да го сочува својот гол. До 81. минута мрежата одлично ја одбрани прилепчанецот на голот од Осогово, Ѓорѓи Јованоски. Но откако тој доби црвен картон по фаулот врз Горан Димоски надвор од шеснаесетникот, меѓу стативите застана играчот Никола Стоиловски. И тој ја сочува својата мрежа во наредните 14 минути, 9 од основниот дел и 5 од судиското надополнување. Најизгледната шанса ја имаше Бектеш Исмаил со удар во левиот голмански агол, но Ѓорѓи Јованоски се фрли и одбрани.
ПОБЕДА: И. Николоски, М. Талески, Ивчески, Казимоски (63. Д. Шаркоски), А. Петрески (63. Љумовиќ), Исмаил (79. Г. Димоски), П. Петроски, Ф. Димоски, Кофиловски, Каба, Богевски. Тренер: Стојанче Дунимаглоски.
ОСОГОВО: Ѓ. Јованоски, Давков, Стоиловски, Стојов, К. Ристовски, Николовски, Ефтимов (84. Ѓорѓиев), Јованов (73. Манов), Соколов, Паунов (84. Мурати), Симоски (95. Постоловски). Тренер: Крсте Крстев.
РЕЗУЛТАТИ 27. КОЛО: Победа – Осогово 0:0, Саса – Вардар Н. 4:2, Новаци – Вардарски 4:0, Башкими – Скопје 1:1, Охрид – Кожуф 1:0, Беласица – Детонит 1:2, Арсими – Брегалница 2:1, Македонија ЃП – Борец 3:0.
ТАБЕЛА: Македонија ЃП 60, Арсими 58, Башкими 57, Брегалница 52, Охрид 42, Детонит 40, Беласица 39, Саса 36, Скопје 35, Кожуф 33, Новаци 32, Победа 31, Вардар Н. 30, Осогово 23, Борец 13, Вардарски 11.
СЛЕДНО 28. КОЛО: (вторник, 6 мај, 17 часот): Скопје – Победа, Вардар Н. – Македонија ЃП, Борец – Арсими, Брегалница – Беласица, Детонит – Охрид, Кожуф – Башкими, Осогово – Новаци, Вардарски – Саса.
ЦЕЛ СТАДИОН СКАНДИРАШЕ ЗА ПОЧИТ КОН НИКОЛЧЕ ЗДРАВЕСКИ
Пред почетокот на мечот имаше едноминутно молчење за почит кон прерано починатиот Николче Здравески, легендарниот фудбалер и тренер од Прилеп. Голема негова фотографија беше истакната на големата трибина, а домашните фудбалери истрчаа на теренот со маички на кои покрај фотографијата пишуваше „Ин мемориам“. А целата публика неколкупати го скандираше неговото име во знак на почит и голема благодарност за се она што го направи за прилепскиот и македонскиот фудбал.
Меѓу публиката во црно облечени беа членовите на неговото семејство.
