Заврши Осмиот меморијален меѓународен ракометен турнир „Миле Нешковски“ во Прилеп. Победник е Дубочица од Лесковац, Србија, која во финалето со убедливи 30:21 го совлада Мултиесенс од Скопје. Дубочица на овој турнир ги доби сите четири меча.
Во борбата за третото место домашниот Прилеп со 29:24 беше подобар од битолски Еурофарм Пелистер 2. За петтото место се избори финскиот Кокс преку победата од 25:22 над Струга. Седмото место е за Пролет, кој со 27:23 го совлада Скопје.
Во салата на СОУ „Ристе Ристески – Ричко“ покрај за трите најдобри екипи, се доделија и поединечните награди: најдобар голман – Иван Ангелески (Прилеп), стрелец – Горан Ристовиќ (Дубочица) со 33 гола, играч – Божидар Илиески (Мултиесенс), за животно дело – Тодор Арапчески (некогашен голман и тренер на Тутунски комбинат).
