Следниот викенд се важни натпревари за женскиот фудбалски клуб Цевитана и машкиот ракометен Прилеп. Двата имаат шанса да прекинат неуспешни серии од седум и осум кола.
Женскиот фудбалски тим Цевитана има седум порази со ред: дома од Саса, Шкендија, Ас унитед и Истатов, на гости со Тиверија, Љуботен и Скопје. Последните бодови беа освоени на 11 октомври, при победата од 6:1 дома со Речица. Сепак, следниот противник е битолскиот Топ гол, тим кој може да се совлада. На тоа укажува досегашниот учинок – Цевитана со 12 бода, Топ гол со 5, а првиот меѓусебен дуел во Битола беше во полза на Цевитана со 4:2. Мечот од 13. рунда на Првата женска фудбалска лига, Цевитана – Топ гол е в сабота (12 часот) на теренот со вештачка трева во Прилеп.
Машкиот ракометен клуб Прилеп има осум неуспешни меча во серија. Има седум порази – дома со скопски Вардар и Пролет, на гости од Мултиесенс, Еурофарм Пелистер, Бутел, неготински Вардар и скопски Вардар, а неуспех е и ремито дома со Голден арт. Последната победа е на 23 септември дома со 30:22 против неготински Вардар. Добра шанса за победа е наредниот дуел дома со скопскиот Мултиесенс. Досега Прилеп освои 7 бода, Мултиесенс 6. На мечот во Скопје беше драматично, со конечен резултат 31:30 за Мултиесенс. Мечот од 12. рунда на Б-групата од машката ракометна Супер-лига, Прилеп – Мултиесенс, се игра в сабота (18,30 часот) во салата на СОУ „Ристе Ристески – Ричко“ во Прилеп.
