Серијата контролни, подготвителни мечеви, за второлигашот Победа почнува денеска во 18 часот. На Градскиот стадион „Гоце Делчев“ во Прилеп е дуелот Победа – Вардар Неготино. Прилепската публика која е позната во минатото и по масовната посета на тренинзите, секако дека со нетрпение го чека денешниот прв пријателски меч за да го види новиот изглед на Победа. Во врска со ова, треба да се очекува младите фудбалери кои настапуваа пролетоска да бидат посилни со искуството, а кон нив се придодаваат и новодојдените кои се одбрани со таа цел да го зголемат квалитетот. Досега од прилепскиот клуб информираа дека пристапиле: 20-годишниот десен страничен Матеј Ѓурчиновски (Слога Виница), 19-годишниот напаѓач Никола Талески (Беласица). 21-годишниот крилен напаѓач Амир Фејзуловски (Детонит) и 20-годишниот играч за врска Мартин Андоновски (Кожуф).
Во средата поради големите горештони се откажа дуелот Победа – Борец.
