Во четвртфиналето од Купот во женски фудбал оди екипата на Борец по победата од 8:2 над Деспина, на игралишето со вештачка трева во Прилеп. Фаворитот убедливо победи, а за прилепчанките може да се каже дека даваа солиден отпор до 43. минута кога падна вториот гол. Првиот погодок го даде Србинката Николина Батиниќ во 7. минута, а вториот е запишан како автогол на Кристина Павлоска. Во второто полувреме уште шест гола за Борец – уште два од Батиниќ, два од капитенот Елма Шемсовиќ и по еден од останатите Србинки, Нина Јовановиќ и Жељана Максимовиќ. Но, и во претежно младиот состав на Деспина има неколку мајсторки за голови, како капитенот Катерина Милеска која со два гола за три минути успеа, колку-толку, да го ублажи поразот на крајот.
Деспина в среда има уште еден тежок меч, во 16. коло од Првата лига, кога во Прилеп гостува кандидатот за титулата, струмичка Тиверија.
