Според очекувањата трите бода останаа во Прилеп, преку победата на Победа над Осогово, во 23. коло од Втората фудбалска лига – Исток. Но скромниот резултат од 2:1 ги разочара близу 2.000 гледачи на Градскиот стадион „Гоце Делчев“. Прилепската е позната како публика која има високи критериуми и тешко ја прифаќа синтагмата „слаб ден“. Според ова, се очекуваа повеќе голови во гостинската мрежа, не само врз основа на разликата во квалитетот на ривалите, туку и поради почетните 12 минути. Тогаш на мошне лесен начин домашните дојдоа до водство од 2:0, преку Јорданчо Наумоски од слободен удар од далечина и Бојан Спиркоски со реализација по одбиена топка. Гледачите во тој период се обложуваа колку голови ќе даде Победа – под или над пет, се до 36.минута кога гостите намалија на 2:1 со убав гол на капитенот Тоше Манов од слободен удар.
Оттогаш натаму, се до крајот, нервоза на трибината по многу пропуштени шанси, поништен гол на Филип Димоски поради офсајд и стравување да не се случи израмнување по неколку мешаници пред прилепскиот гол. Се очекуваше мирен натпревар, но пет жолти картони добија домашните фудбалери, дури по мечот и црвен е покажан на голманот Дарко Тофилоски. Сепак, од се што се случуваше најбитен е резултатот и фактот што Победа останува со реални шанси за првото место за влез во прволигашкото друштво.
РЕЗУЛТАТИ: Победа – Осогово 2:1, Беласица – Саса 2:0, Слога – Локомотива 8:0, Кожуф – Братство 0:0, Пехчево – Детонит 0:1.
ТАБЕЛА: Слога 51, Беласица и Победа по 50, Саса 44, Кожуф 28, Пехчево и Осогово по 27, Детонит 24, Братство 14, Локомотива 6.
СЛЕДНО 24. КОЛО (23 април, 16 ч.): Саса – Победа, Осогово – Слога, Беласица – Пехчево, Братство – Детонит, Локомотива – Кожуф.
Младинците дадоа седум гола
Победа дома со 7:0 ја совлада Ренова, во 19. коло од Младинската супер лига. По два гола дадоа Филип Тодороски и Давид Дебрешлиоски, по еден Давид Иваноски, Христијан Јосифоски и Леонардо Богданоски. Продолжува борбата за титулата, за преземање на првото место кое го држи Вардар.
