Пред 11 април 1976 година прилепските спортски екипи во ракомет, кошарка и одбојка немаа можност да играат во затворен простор, туку само на отворено игралиште. Така, ракометарите на Тутунски комбинат и во Втората југословенска лига – Југ своите натпревари како домаќини ги играа на игралиштето кај Вишата економска школа. Дури на споменатиот датум е одигран првиот првенствен натпревар во новоотворената Универзална сала. Домашниот Тутунски комбинат со 36:30 го совлада Будуќност од Титоград, денешна Подгорица.
За кусо време се изгради и втора сала, уште поголема, салата „Македонија“, пуштена во употреба на 8 септември 1978. И таму се играа спортски натпревари, особено тогаш кога Универзалната служеше привремено како магацин за тутун.
Од ниедна до две сали и обратно, тоа е патот до денешната состојба, каде мечевите се само во училишните сали во Прилеп.
