Уште еден висок пораз на Победа на свој терен, од Шкупи 0:6. Сосема исто како што беше на 27 ноември минатата година. Ист терен, исти противници, ист резултат од 0:6. Но, сега за разлика оттогаш, уште потажно во Прилеп. Тажно на стадионот, тажно и во соблекувалната. Само мртва тишина, до стомак наведнати глави. Глетка која без збор зборува дека шансите за опстанокот и преку бараж се смалени. Бидејќи Победа остана на 13 бода, а Скопје стигна до 18.
Не се наѕираше ни оддалеку дека ќе има таков резултат, дека неколку стотини гледачи ќе видат голови само во домашната мрежа. Бидејќи во првото полувреме, особено до 37. минута Победа добро се спротивстави. Цврста одбрана, голманот Дарко Тофилоски одличен на голот, неколку опасни акции и неискористени можности за контри. Тогаш Оливер Стоименовски несреќно постигнува автогол, и натаму гостинот ја има сета контрола врз играта. По вториот гол во 50. минута, на Шоуајне Цефас, почна да се празни трибината, а да се полни домашната мрежа. Следеше гол на Дамиларе Адетунџи во 55., пак на Цефас во 59., а во листата стрелци се запишаа Антонио Алварез во 71. и Данфа Мамаду во 79. минута.
ПОБЕДА (4-3-3): Тофилоски (46. Котевски) – Хани, Стомнароски, Стоименовски, Ѓурковиќ – Дадет (46. Фавахри), Ј. Наумоски (74. Паноски), Аризанкоски – Алиу (70. Ф. Спиркоски), Ферати, Кудијан (62. Делибашиќ). Тренер: Благојче Дамевски.
ШКУПИ (3-4-3): Наумовски – Илиески, Младеновски, Брдаровски (52. Тимовски) – Алварез (74. Мамаду), Трапановски (74. Златков), Ричков (80. Сулејман), Алберт – Адетунџи, Цефас (80. Демири), Ацковски. Тренер: Арслан Џихат.
РЕЗУЛТАТИ ОД 26. РУНДА: Победа – Шкупи 0:6, Брегалница – Македонија ЃП 2:1, Тиквеш – Силекс 0:0, Скопје – Струга 1:1, Академија Пандев – Работнички 0:0. ТАБЕЛА: Струга 50, Шкупи 45, Шкендија 44, Силекс 39, Брегалница 35, Македонија ЃП 32, Тиквеш 30, Работнички 25, Академија Пандев 21. Скопје 18, Победа 13.
СЛЕДНО 27. КОЛО (сабота, 15 април во 16 часот): Струга – Победа, Македонија ЃП – Академија Пандев, Работнички – Скопје, Шкендија – Тиквеш, Силекс – Брегалница.
ВИДЕО НА ЛИНКОТ:
