На 23 јуни 1999 година се одигра првиот меч од 1. коло на европскиот Интертото куп на УЕФА, Победа Прилеп (Македонија) – Озета Дукла Тренчин (Словачка). На Градскиот стадион „Гоце Делчев“ за близу 10 илјади гледачи беше „шок“ во 6. минута кога гостите со голот на Андреј Поразик поведоа со 1:0. Меѓутоа, домашните се разиграа, а се разлути Бразилецот Рожерио Оливеира. Тој цела недела не тренираше, седеше по летните бавчи очекувајќи трансфер во Турција и не планираше да игра. Но во последен миг се премисли, и на разделбата со прилепската публика сакаше да го одигра најдобриот меч. Така и се случи. Во 22. минута израмни на 1:1, во 30. го даде вториот гол за ерупција на трибините. Гостите ги фати паника, и ништо не ги спасуваше. Во 54. минута Оливеира стигна до хет-трик. Постигна и уште еден гол од полуволеј, но судиите од нејасни причини не му го признаа, па конечниот резултат беше 3:1 за Победа.
ПОБЕДА: Груевски – Жилсон (46. П. Ристовски), Николаевски, Стојковиќ, Р. Петров (63. Грозданов) – М. Стојкоски (88. Ј. Манев), Г. Лазаревски, Каранфилоски, Н. Здравески – Главевски, Оливеира. Тренер: Драган Канатларовски.
На реваншот Оливеира не настапи, Победа загуби со 3:1, но победи на пенали и се пласира во 2. коло за дуелите против италијанската Перуџа.
