Утре (сабота) се натпреварите од 20. рунда на Втората фудбалска лига на Македонија. На Градскиот стадион „Гоце Делчев“ во Прилеп е дербито со многудецениска традиција, Победа – Беласица. Овие два тима имаат играно и пред 15 илјади гледачи. Сега прилепскиот тим се бори за да му се доближи на струмичкиот кој е четири места погоре на табелата. Победа атакува кон првата пролетна победа, по двата пораза (од Башкими и Охрид) и двете нерешени (со Тетекс и Осогово). За да победат, прилепчаните ќе мораат да постигнат барем еден гол, прв пролетва. Есеноска во Струмица беше 3:1 за Беласица, тим во кој има прилепчанец, 18-годишниот Никола Талески.
– Мое мислење е дека ќе биде тежок натпревар, со многу борба. Очекувам бодовите да ги однесеме во Струмица – вели Никола Талески.
ДВОЈКИ 20. КОЛО (сабота во 14 часот): Победа – Беласица, Охрид – Осогово, Башкими – Новаци, Тетекс – Саса, Беса – Детонит, Пелистер – Кожуф, Арсими – Караорман, Скопје – Вардар Н.
ТАБЕЛА: Беса 50, Пелистер 42, Детонит 41, Арсими 35, Охрид 30, Башкими и Скопје 28, Вардар Н. 27, Беласица 25. Кожуф 24, Новаци 23, Тетекс 20, Победа 17, Осогово 16, Караорман 15, Саса 8.
