Денешното издание на Меѓународниот шаховски брзопотезен турнир „Алкалоид ОПЕН“ во Скопје донесе нов голем успех на велемајсторот Звонко Станојоски. Прилепчанецот е на високото второ место, меѓу 234 учесници од 7 држави (Бугарија, Шпанија, Германија, Грција, Косово, Србија и Македонија). Иако беше деветторангиран на стартната листа, со само еден пораз (од првакот ВМ Кирил Георгиев), две ремија (со Александар Аранѓеловиќ и со ИМ Милош Станковиќ – двајцата од Србија), осум победи (Александар Нолевски, Стојан Велкоски, ФМ Владимир Тркаљанов, Георги Петров, ИМ Дејан Стојановски, ИМ Никола Николовски – сите од Македонија, Живан Шушулиќ, ИМ Душан Секулиќ – двајцата од Србија), Станојоски со 9 поени успеа да се издигне седум места погоре на конечната табела. За него е наградата од 21 илјада денари. Учествуваа и други прилепчани. Така, Горан Готовуша е на 31. место со 7,5 поени, Дејан Ѓорѓиески на 40. со 7, ФМ Роберт Велески на 50. со 6,5.
Велемајсторот Кирил Георгиев до првото место и наградата од 26 илјади денари стигна со освоени 9,5 поени.
