Женскиот ракометен суперлигаш Деспина има нов тренер – Андријано Котевски. Ова е крупна промена во клубот затоа што долги седум години на таа позиција беше Страшо Илиески. За потсетување, Илиески од летото 2017 стана тренер наследувајќи го Рубин Богојески, токму тогаш кога клубот од Прилеп се преименува во Деспина. А што се однесува до Котевски, ракометната јавност го знае по титули со кадетски тимови на скопски Вардар и Прилеп, со пионерките на Пелистер, по учество во Стручниот штаб на Македонија на Кадетско европско првенство, како и по тоа што беше тренер и на машкиот клуб Прилеп, пред четири – пет години. Во Деспина доаѓа од Пелистер. Претстојат денови кога ќе се знае дали ќе има промени и во играчкиот кадар. Таму највозрасната Мери Гичева продолжува и како играч и како помошник-тренер.
Првиот собир е закажан за 5 август.
