Каде и да гостува Победа, таму се и нејзините симпатизери. Така и попладнево во Белград. Од главниот град на Србија ни се јави Марко Нешиќ, чија мајка е родум од Прилеп, па од дете е приврзан за Победа. Тој иако со работни обврски, совреме стигнал до стадионот на Вождовац, каде била уште една жена која сакала да го гледа натпреварот со српскиот суперлигаш.
– Пред влезната врата некое службено лице ни рече дека не е предвиден влез, бидејќи мечот бил од затворен тип. Така, единствено успеав само да го фотографирам паркираниот автобус на Победа – ни јави Марко.
Според клупските информации, конечниот резултат е 1:0 за Вождовац, а Победа се претстави во добро издание. Мечот е одигран на добар терен и убав објект.
- Интересен стадион. Подигнат е на трговски центар. Прво е трговскиот центар, а од неговиот покрив почнува стадионот. Кога бев дете, пред две децении, тука беше маалско игралиште, а сега е мал но убав стадион – вели Марко Нешиќ.
- Победа не се враќа веднаш, туку утре (среда) во Крупањ ќе одигра пријателски меч со српскиот прволигаш Лозница.
