Во Аминдео, Грција се одржа Меѓународен турнир во џудо, со учество на околу 400 натпреварувачи од Грција, Молдавија, Грузија, Италија, Бугарија и Македонија. Џудо-клубот Сеишин од Прилеп се претстави со 7 натпреварувачи при што освоени се 2 сребрени медала. Тоа им успеа на кадетите Јован Стојановски и Теа Настоска. Другите натпреварувачи Михаил Стојановски, Георгиј Магдески, Борис Џагадуроски, Михаил Димоски и Елеонора Илиоска иако со по една или две победи, не се закитија со медали при одлични борби.
– Мораме да потенцираме дека сите беа под силен притисок на судиите и затоа нашите натпреварувачи, практично, беа оневозможени и да сторат нешто повеќе. Сепак, Сеишин е задоволен од настапот на сите и постигнатиот успех на еден ваков силен меѓународен натпревар на кој покрај противниците наспроти себе ги имавме за противници и судиите и натпреварувачката комисија кои направија се за нашите џудисти да не се закитат со медал – велат од клубот Сеишин, чија екипа беше водена од тренерот и селектор на македонската кадетска селекција Дејан Мицкоски.
Прилепскиот клуб настапи и во Ниш, Србија на Меѓународен меморијален турнир со учество на 475 натпреварувачи од Србија, Романија, Бугарија, Босна и Херцеговина и Македонија. Таму освоени се 4 медала ( 2 сребрени и 2 бронзени). Сребрени се Тамара Илиоска кај пионерките и Тамара Стојкоска кај децата, а бронзени Теодора Илиоска кај пионерките и Марио Конески кај децата.
Џудистите ги предводеа тренерите Мартин Ристески и Марио Тошески со поддршка на ветеранот Киро Здравески.
