Денешниот дуел Победа – Вардар возбудливо започна, така продолжи, но само до 38. минута. Ова е впечатокот базиран на постигнатите голови и малиот број зрели шанси. А бидејќи се одигра многу борбено, се очекуваа многу повеќе возбудувања пред двата гола, особено во второто полувреме, кога само еден гол можеше да го одлучи победникот. Но тој гол не се постигна и резултатот е истиот од првото, 1:1. Меѓутоа, вредат двата постигнати гола. Слободно може да се рече – вистински евро-голови! Победа поведе преку Дестан Адили кој во 11. минута со силен удар оддалеку ја затресе мрежата за голема радост на трибините. Но гостите возвратија повеќепати со атаци кои ги спречи во последен миг одбраната, а и неколку опасни удари кои ги одбрани голманот Антонио Столевски. Сепак, неминовно беше изедначувањето во 38. минута, по мајсторски изведениот слободен удар на Сунај Хасан.
ПОБЕДА: Столевски, Сарески (Д. Шаркоски), И. Трајкоски (77. Тасески), Д.Дебрешлиоски (60. Г. Димоски), Адили, Поп-Антоски, Ивчески, Кофиловски, С. Спиркоски (60. Ристов), Да. Спиркоски, Богевски. Тренер: Јане Николоски.
ВАРДАР: Тасев, Најдов (58. Ќазимов), Стојчески, Лембовски, Сум. Хасан, Сун. Хасан (88. Јанкулов), Османи (77. Тодоров), Мојсовски, Шишков (88. Нејковски), Павлески, Зумровски. Тренер: Горан Тодорчев.
ХУМАНОСТ
Гледачите, сведоци на овој меч се покажаа во хуманиот дел. Секоја купена влезница е поддршка, помош на малиот Стефан за негово лекување во странство. И тој беше присутен и поздравен од сите на стадионот, на центарот од теренот, пред почетокот на натпреварот.
САШО КРСТЕВ НА ТРИБИНАТА
Некогаш на теренот, денеска на трибината во Прилеп. Ова важи за Сашо Крстев, некогашниот член на Победа, во деведесеттите години од минатиот и во почетните од овој век. Во прилепскиот тим одигра и неговиот помал брат Миле. Повозрасните фудбалски љубители штом го видоа, веднаш му пристапија за да се поздрават. Спомените се неизбришливи.
Денеска Сашо Крстев го предводеше Вардар, како негов претседател.
РЕЗУЛТАТИ: Победа – Вардар Н. 1:1, Охрид – Саса 1:1, Новаци – Детонит 0:1, Беласица – Кожуф 2:0, Осогово – Караорман 2:1, Башкими – Скопје 0:0, Тетекс – Арсими 4:6, Беса – Пелистер 0:0.
ТАБЕЛА: Беса 67, Пелистер 61, Детонит 55, Арсими 44,Охрид и Скопје 39, Башкими и Вардар Н. 35, Кожуф и Беласица 34, Новаци 28, Победа 27, Тетекс 24, Осогово 23, Саса 19, Караорман 15.
СЛЕДНО 27. КОЛО (вторник 30 април во 16 часот): Скопје – Победа, Беса – Охрид, Пелистер – Тетекс, Арсими – Башкими, Вардар – Осогово, Караорман – Беласица, Кожуф – Новаци, Детонит – Саса.
ВИДЕО-ИЗВЕШТАЈ на линкот
