Попладнево на Градскиот стадион „Гоце Делчев“ во Прилеп се случи првиот собир на второлигашот Победа. Првиот позитивен впечаток е присуството на 25 првотимци. Тие го одработија првиот тренинг под инструкции на шефот на Стручниот штаб Јане Николоски и асистентот Стојанче Дунимаглоски.
Меѓу фудбалерите има нов, 20-годишниот битолчанец Мартин Андоновски, досегашен играч за врска од гевгелиски Кожуф. Од прилепскиот клуб најавуват уште нови следниве денови.
Во врска со пријателските натпревари, потврдено е дека планот е за вкупно седум. Еве го редоследот: на 17 јули со Борец во Прилеп, на 20 јули со Вардар Неготино во Прилеп, на 31 јули со Охрид, на 3 август со Беласица, на 10 август со Брегалница Штип, а во опција се уште два термина – 25 и 28 јули.
Во првата фаза, што ќе се одработува во Прилеп, ќе се одржуваат по два тренинга – на Градскиот стадион „Гоце Делчев“ и во просториите од Кикбокс-клубот „Ронин“.
Новости и во Управниот одбор на Победа. Таму нов член е Никола Трајкоски, назначен за технички директор на клубот. Тој досега беше познат како претседател на Клубот за мал фудбал Победа, учесник во Втората футсал-лига на Македонија. Исто така, Трајкоски е познат и како долгогодишен член на Навивачката група „Мајмуни“.
Во врска со сите новости најавена е прес-конференција во ФК Победа за следниве денови, на која ќе има детали за поддршката на клубот од страна на Општина Прилеп.
