Утре (недела) стартува новото првенство од Втората кошаркарска лига на Македонија, во тие рамки и мечот Мега баскет (Прилеп) – Навико Академија ФМП (Скопје). Во пресрет на овој дуел има позитивни новости од прилепскиот клуб. Имено, доведени се пет нови играчи на позициите плејмејкер и центар: Борче Кочовски (Пелистер, Битола), Дамјан Ивановски, Давид Нешиќ, Андреј Стојановски (Феникс, Скопје), Христијан Несторовски (Еуроникел, Кавадарци). Според ова, може да се очекува уште еден исчекор во амбициите во споредба со претходната сезона, кога Мега баскет, предводен од тренерот Мико Голубовиќ, беше учесник во четвртфиналето од плејофот, против првакот МКК Куманово.
Други учесници во Втората лига се: Маџари, Работнички, МЗТ Уни банка, Ангели, Партизан ВС, Бутел (сите од Скопје), Борец (Велес), Црн Дрим (Струга), Соколи (Штип) и Охрид.
Утрешниот меч, Мега баскет – Навико Академија ФМП се игра во салата од ООУ „Добре Јованоски“во Прилеп со почеток во 19 часот.
