Прилепска Победа се врати на победничката патека, по денешниот триумф од 6:2 врз Вардарски од Богданци, во 11. коло од Втората фудбалска лига на Македонија. Не беше лесно, затоа што гостите изненадија со водството од 2:0. Имено, со головите на Никола Стојков во 10. и Ристо Миленковиќ во 20. минута Вардарски поведе со 2:0. Сосема неочекувано, ако се знае дека Вардарски е последен на табелата со 2 бода.
Сепак, пресвртот се случи по 31. минута. Тогаш на 1:2 намали Давид Јошески. Истиот играч, Давид Јошески, даде гол и во 34. минута за израмнување на 2:2. Така се отиде на одмор. Во вториот дел четири гола со ред на Никола Талески, во 51., 58., 86. и 91. минута. Есенскиот ефект на овие играчи е: Јошески – 3 гола, Талески – 10. Победа уште кога поведе и направи комплетен пресврт веќе се означи победникот на овој меч. Значајни три бода за екипата на Стојанче Дунимаглоски, а мошне солидно издание на тимот на некогашниот селектор Ѓоре Јовановски.
ПОБЕДА: Столевски, Ивчески, Андоновски (43. Д. Шаркоски), Н. Талески, Д. Дебрешлиоски, Јошески (81. Д. Н. Паскоски), Кукески, С. М. Спиркоски (81. Арифи), Да. Спиркоски (67. М. Талески), Ѓурчиновски (67. Ристов), Богевски. Тренер: Стојанче Дунимаглоски.
ВАРДАРСКИ: Дранго, Зенговски (37. Пеев – 73. Бошков), Миленковиќ, Николовски, Чеков, Радевски, Стојков, Мингов (60. Стојанов), Спасовски, Баламов, Карамитров. Тренер: Тренер: Ѓоре Јовановски.
РЕЗУЛТАТИ 11. КОЛО: Победа – Вардарски 6:2, Борец – Вардар Н. 1:2, Македонија ЃП – Брегалница 3:0, Арсими – Детонит 2:1, Беласица – Кожуф 0:0, Охрид – Скопје 1:1, Башкими – Осогово 5:1, Новаци – Саса 0:1.
ТАБЕЛА: Македонија ЃП и Башкими 26, Брегалница 24, Арсими 23, Охрид 20, Кожуф 17, Беласица 16, Детонит и Саса 15, Победа 13, Новаци и Вардар Н. 11, Скопје 10, Осогово и Борец 5, Вардарски 2.
СЛЕДНО 12. КОЛО (недела, 10 ноември, 13 часот): Осогово – Победа, Вардар Н. – Саса, Вардарски – Новаци, Скопје – Башкими, Кожуф – Охрид, Детонит – Беласица, Брегалница – Арсими, Борец – Македонија ЃП.
ЕДНОМИНУТНО МОЛЧЕЊЕ
Пред мечот Победа – Вардарски имаше едноминутно молчење од сите присутни на Градскиот стадион „Гоце Делчев“ во Прилеп во знак на почит кон синоќа починатиот на 71 година Јове Магдески, некогашен легендарен играч и тренер на Победа. Играчката кариера му беше меѓу 1969 и 1982 година, а тренерската меѓу 1987 и 1991 година.
Магдески беше избран за најдобар спортист на Прилеп за 1977 година.
