Како и што се очекуваше, прилепскиот шаховски тим Пелагон стана прволигаш откако го освои првото место во Финалната група од Екипното првенство на Македонија – Втора лига во Охрид. На табелата од оваа фаза прилепската екипа е прва со пет бода, преку две победи е едно реми. Победите се над скопските Центар (4:2) и со Карпош (5:1). На првиот дуел партиите ги добија ИМ Младен Миленковиќ, ИМ Горан Арсовиќ и Марјан Дамчески, ремизираа ИМ Драшко Бошковиќ и Горан Готовуша. На вториот победија ИМ Бошковиќ, ИМ Миленковиќ, ИМ Арсовиќ и Готовуша, ремизираа Дејан Ѓорѓиески и Мартин Николовски. Третиот дуел заврши нерешено (3:3) со скопско Шкупи, каде сите партии се реми, на ИМ Миленковиќ, ИМ Арсовиќ, Ѓорѓиески, Готовуша, Дамчески и Николовски. Според ова, сега Прилеп има два прволигаша – Пелагон и ШК Прилеп.
Покрај Пелагон со пет бода, второто Шкупи со четири е прволигаш, додека заостанаа Центар со три и Карпош без бод.
