Денешниот е четвртиот и последен ден од Осмиот мемомријален меѓународен ракометен турнир „Миле Нешковски“. По одигрувањето на мечевите за конечен пласман ќе се знаат екипните награди за прво, второ и трето место и поединечните– за голман, стрелец и играч. Една награда веќе е позната, тоа е наградата за животно дело, за голем придонес кон прилепскиот ракомет. Овојпат таа ќе му биде доделена на Тодор Арапчески – Тошко, во шеесеттите, седумдесеттите и осумдесеттите години на 20 век легендарен голман и голмански тренер во некогашниот Тутунски комбинат, клуб долгогодишен член на Втората југословенска лига. Во врска со кариерата на Арапчески, новинарот Миле Талески во книгата „Монографија за прилескиот ракомет “ има напишано:
„…Прилепската и македонската, па и пошироката јавност, добро го паметат Тошко Арапчески по своите бравурозни одбрани, а знаеше да одбрани и серија од седум пенали. Знаеше да присили противничките голгетери да му честитаат за бравурозните одбрани. Беше бестрашен, со префинети рефлекси и ги воодушевуваше и симпатизерите на противничките екипи. Тошко, честопати, беше јунакот кој на својата екипа и носеше победа. Никогаш не беше во слаба форма, а за него сите натпревари беа како првенствени… А, дека беше еден од најдобрите голмани во Македонија најдобро потврдува фактот што ги бранеше и боите на македонската репрезентација. Со право беше најдобар спортист и на Тутунскиот комбинат и на Прилеп…“
Пред доделувањето на наградите, еве ја денешната програма во СОУ „Ристе Ристески – Ричко“:10 ч. за 7. место: Скопје – Пролет, 12 ч. за 5. место: Струга – Кокс, 14 ч. за 3. место: Прилеп – Еурофарм Пелистер 2, 16 ч. финале: Дубочица – Мултиесенс.
