ПРИЛЕПЧАНЕЦ КРАЈ АУТ-ЛИНИЈА ПРЕД 90 ИЛЈАДИ ГЛЕДАЧИ!

Покрај фудбалери и тренери, Прилеп имал и врвни фудбалски судии. Сепак, поради тоа што долго време е жител на Скопје, недоволно се споменува како прилепчанец Петар Костоски – Перула. Тој од сите Македонци има највисоко достигнување, до финалето од Купот на европските шампиони, денешна Лига на шампионите. Тоа се случи на 30 мај 1973 година на стадионот „Маракана“ во Белград, каде пред 90 илјади гледачи се одигра финалето Ајакс – Јувентус (1:0). Костоски беше еден од помошниците судии, токму на страната каде се постигна единствениот гол, дело на Џони Реп. По прегледот на снимката се гледа дека нема офсајд, дека се е регуларно. А и воопшто, делењето на правдата беше со највисока оценка за овој меч. За спомен е фотографијата покрај славниот капитен на Ајакс, Јохан Кројф.

Костоски умре на 79 години во Скопје, во 2004 година.