Европско поединечно шаховско првенство се одржува во Ефорие Норд, во близина на Констанца (Романија). Учествуваат 40 држави со 375 шахисти, меѓу кои дури 102 се велемајстори. Што се однесува до Македонија, претставена е со ИМ Филип Панчевски и ИМ Емил Ристески од Скопје, ИМ Тони Лазов од Неготино и ФМ Роберт Велески од Прилеп.
Прилепскиот фидемајстор на стартната листа беше на 309. место. На првите две партии не се покажа според желбата, загуби од ИМ Тобиас Коел од Германија и од ФМ Јахим Смолик од Чешка. Но веќе во третата партија постигна победа над Роман де Винтер од Белгија, а со Умид Асланов од Азербејџан одигра реми. На петтиот меч забележа уште една победа, над ФМ Роберт Настасе од Романија, а денешен шести ривал му е ФМ Сохум Лохиа од Англија. Со 2,5 поени Велески на табелата е на 224. место.
Засега од Македонците највисоко е ИМ Тони Лазов, на 140. место со 3 поени, по поразот од ВМ Елхам Амар од Норвешка, ремијата со ВМ Јахли Соколовски од Израел и ВМ Вахап Санал од Турција, победите над Андреј Станица од Романија и со ФМ Илија Станоевиќ од Србија. Денеска се среќава со ВМ Гига Купарадзе од Грузија. Подолу, еден до друг на табелата со по 2,5 поени се ИМ Емил Ристески (194. место) и ИМ Филип Панчевски (195. место). Ристески загуби од ВМ Матеј Шебеник од Словенија, ремизира со Јана Марушин од Украина, со ВМ Елхам Амар од Норвешка и со ИМ Филип Харинг од Словачка, а постигна победа над ВФМ Мишел Катков од Израел. Денешен ривал му е Олексиј Карватски од Украина. Панчевски има порази од ВМ Стаматис Куркулос од Грција и од ВМ Адам Козак од Унгарија, реми со ВИМ Дариа-Мируна Лехачи од Романија, а и две победи – над Андреј-Мирчеа Казан од Романија и со ИМ Фред Беренд од Луксембург. Денеска игра против Даниел Илиагуев од Израел.
Предвидени се вкупно 11 кола.
