Денешниот фудбалски натпревар Брегалница – Работнички наместо во Штип ќе се одигра на Градскиот стадион „Гоце Делчев“ во Прилеп. Станува збор за меч од 26.коло на Првата фудбалска лига, што значи прилепчаните ќе можат да гледаат прволигашки фудбал. Екипата на прилепска Победа веќе четири години е во второлигашкиот ранг, со амбиции наесен да се врати во прволигашкото друштво. Но, прилепската публика со време се навикнува да ги гледа прволигашките дуели. Есеноска во Прилеп се одигра дуелот Тиквеш – Шкендија (0:0), а денеска од 15 часот е Брегалница – Работнички, шестиот со осмопласираниот на табелата.
Штипскиот тим не може да игра дома поради реновирањето на теренот во Штип, така што и претходниот меч со Ренова (2:2) се одигра настрана, во Скопје.
