Течат последните денови за пријавување учество на претстојниот традиционален Хуманитарен турнир во мал фудбал „Свети Никола“ во Прилеп, чии покровители се компанијаата „Комфи ангел“ и Општина Прилеп во соработка со Здружението на спортови „Марков град“. Дознаваме дека се одвива вистинска трка за место меѓу 900 учесници, со оглед на ограничениот број екипи. Интересот е од цела Македонија.
На денешната прес-конференција на која присуствуваа градоначалникот д-р Борче Јовчески, Александар Крстески од Здружението и Македонче Дуртаноски од Организациониот одбор, беше споманто дека меѓу досега пријавените се повеќе екипи отстрана, како екипа составена од футсал-репрезентацијата на Македонија, екипи од Охрид, неколку од Битола, од Новаци, од Кавадарци… Штом се пополне бројот, пријавувањето завршува. Во сениорската конкуренција каде ќе има 32 екипи, котизацијата е 8000 денари по екипа, а во пионерската е 3000 денари, каде се седум возрасни категории. Затоа пак наградите се примамливи – во сениорската првото место има 240 илјади денари, второто 120 илјади, третото 60 илјади.
Турнирот стартува в сабота, во салата на ОУ „Добре Јованоски“со капацитет од близу 400 гледачи.
ПОБЕДА – ПЕЛИСТЕР
Организаторите се потрудија да доведат познати фудбалери, некогашни репрезентативци кои ќе одиграат пријателски, ревијален натпревар. Станува збор за меч Победа – Пелистер, меѓу ветераните на двата тима, традиционални соседски ривали.
Потсетување на некогашните фудбалски ѕвезди од Прилеп и Битола.
