Во зимскиов преоден рок кој е при крај, во прволигашот Победа пристапија десетмина нови фудбалери. Најнов е 21-годишниот Керим Делен (Боткирка, Шведска), а има уште тројца од странство. Тоа се: 19-годишниот Василије Делибашиќ (Белград, Србија), 19-годишниот Миодраг Петковиќ (Крушевац, Србија), 23-годишниот Салеем Фавахри (Мазра, Израел).
За место во тимот на тренерот Благојче Дамевски ќе се борат и засилувањата од државава. Меѓу нив се двајца штипјани, 24-годишниот Ване Јованов (доаѓа од Саса, има играно за скопски Вардар, Академија Пандев, штипска Брегалница) и 26-годишниот Владимир Дујовски (доаѓа од Саса, а има играно за штипска Брегалница),
Списокот продолжува со 23-годишниот кочанчанец Оливер Стоименовски (доаѓа од Македонија ЃП, а има играно за Работнички, во Азербејџан), 26-годишниот кичевчанец Арменд Алиу (доаѓа од Аресими Гостивар, а има играно за Воска, Ренова, Македонија ЃП , во Косово), 23-годишниот прилепчанец Лука Трајкоски (повратник во Победа, доаѓа од Борец, а има играно за Тиквеш и Македонија ЃП). На крајот го споменуваме и 25-годишниот скопјанец Андреј Кудијан (доаѓа од Кожуф, а има играно за Гостивар, штипска Брегалница, Скопје, Работнички). Тој е стрелец на двата гола за Победа, на пријателскиот меч со Борец, во неделата.
Екипата на Победа борбата за прволигашки опстанок ја почнува в недела, дома, со Работнички.
