Синоќа на 71 година овој свет го напушти Јове Магдески. За него во јавноста се знае се од биографијата, од раѓањето 29.7.1953 до смртта на 1.11.2024 и овде само ќе повториме накусо – фудбалер на Победа во средниот ред секогаш со бројот 8 од 1969 до 1982 година и 6 години нејзин капитен, тренер на Победа во два наврата, пролетта 1987 година и од летото 1989 до летото 1991 година. Најдобар спортист на Прилеп е за 1977 година.
Како играч со префинета техника, велемајсторски дриблинзи и проигрувања, како и со изведба на слободни удари и волеј-удар, има 11 сезони во Втората југословенска лига – Исток и 2 сезони во Републичката лига на СР Македонија, а како тренер пролетта 1987 во Втората југословенска лига и 2 сезони во Третата југословенска лига – Исток. Има настапи во Олимписката репрезентација на Југославија. Учесник е на дербито со најмногу публика (според новинарите 25.000 гледачи) на 15 март 1981 година во Прилеп, Победа – Пелистер 3:1.
Погребот на Јове Магдески е денеска во 13 часот на Новите градски гробишта во родниот Прилеп.
