Синоќа во големата сала од Националната установа центар за култура „Марко Цепенков“ беа доделени награди по повод 3 Ноември, Денот на ослободувањето на Прилеп. Меѓу наградените беа и од областа на спортот. Пред близу илјада присутни во преполната сала, меѓу кои и водечките од Општината, градоначалникот д-р Борче Јовчески, претседателот на Советот Ирена Стерјоска – Локвенец и претседателот на Комисијата за одбележување значајни настани, личности и празници, Игор Николоски, награда плакета доби Фудбалскиот клуб Големо Коњари (лидер во Третата фудбалска лига – Југ), предводен од претседателот Тони Даноски.
Награди дипломи добија: Трајче Зулјамоски, педагог, волонтер, хуманист, некогашен ракометен тренер на женските екипи Тутунски комбинат и Металотехника, Елена Ртоска за особен придонес во развивање на екстремните спортови и Никола Павлески, надежен шахист, со трето место на првенството (прв според рејтингот) во Македонија во категоријата до 16 години.
Беа доделени 10 плакети, 8 дипломи и 2 златни плакети за животно дело – на уметникот, скулптор Жарко Башески и на митрополит преспанско-пелагониски и администратор австралиско-новозеландски, владиката Петар.
