Весниците се сведоци за минатото. Преку нив доаѓаме до настаните од фудбалското минато на Прилеп. Мошне интересен текст е објавен во белградскиот весник „Борба“ на 27 април 1980 година. Тоа е времето кога екипата Победа се бори за опстанок во Втората југословенска фудбалска лига – Исток. На табелата со 15 бода од 21 коло е на дното меѓу 16 тима. Но, Победа е привлечна и во таа ситуација за медиумите. Така новинарот на „Борба“, Славољуб Вујовиќ од Белград доаѓа во Прилеп. На споменатиот ден во весникот се појавува наслов „Победа се сака и кога не победува“. Гледаме објавена фотографија со двајца голмани и 10 играчи, а под фотографијата коментар: Публиката подобра од тимот.
Текстот почнува вака: Ова е , всушност, наша фудбалска приказна за приказната: за градот Прилеп, кој без воздух може, ама без својата Победа не може. Натаму се споменува дека претседател на Победа е Благоја Миноски, генерален директор на Автотранспортното претпријатие „Пелагонија турист“, шеф на Стручниот штаб е сплиќанецот Александар Гвозденовиќ, тренери Борче Ангеловски – Влашето, Кирил Анески – Тумано, Бранко Петкоски – Педано и Методија Крстески – Каше. Белградскиот новинар забележува: Кога на Победа и оди – на стадионот има 20 илјади гледачи, кога на Победа не и оди – на стадионот се 19 илјади гледачи.
Таа сезона Победа отпадна несреќно, поради послаба гол-разлика за еден гол од ОФК Титоград.
