Екипата Стрела (Ерековци) е првиот финалист од плеј-офот за првак на А-лигата од ОФС Прилеп, по денешната победа од 2:0 над Мукос (Дреновци).
На Градскиот стадион „Гоце Делчев“ во Прилеп, во убав амбиент од присутни гледачи и навивачи на двата тима, Стрела се покажа подобар ривал. Во првото полувреме водството од 1:0 го донесе Влатко Петрески. Во второто полувреме, кога Мукос остана без исклучениот Дарко Србиноски, екипата од Ерековци ја искористи предноста и во финишот го зголеми резултатот на 2:0 со голот на Дарко Ристески.
Победата на Стрела е мало изненадување, со оглед на тоа што во основниот дел на првенството Мукос двапати победи во меѓусебните дуели – дома со 4:1, на гости со 3:2, а на табелата собра 44 бода, 4 повеќе од Стрела.
Утре (недела) два меча на Градскиот стадион „Гоце Делчев“. Прво во 10 часот претпладне второто од Б-лигата Боротино игра бараж со претпоследната од А-лигата,Тризла. Попладнето (16 ч.) е дуелот меѓу прво и четвртопласираната од А-лигата, Кадица (Забрчани) – Влазними (Пресил) за пласман во плеј-оф финалето, в среда од 16 часот, каде победникот станува член на Третата лига – Југ.
