Огромен интерес за присуство на трибините од Градскиот стадион „Гоце Делчев“ во Прилеп има за саботното фудбалско второлигашко дерби, Победа – Беласица. Долгодецениската традиција продолжува – кога на дерби гостува Беласица, трибините се полнат во Прилеп.
Почетокот на традицијата е на 17 јуни 1979 година. Тогаш на две кола до крајот од републичката Македонска фудбалска лига, трета по ранг во југословенскиот систем, се сретнаа Победа и Беласица во Прилеп. Победникот ги задржуваше шансите за првото место и пласманот во Втората југословенска лига, поразениот ги губеше. Атмосферата се вжешти и придонесе стадионот да се преполни. Тоа беше рекорд – 15 илјади гледачи. Воодушевените известувачи проценија и повеќе отколку што собира објектот. Победа победи со 3:1, со головите на Златко Конески и два на Владо Настески, додека голот за Беласица го даде Благој Митев, сегашен член на Стручниот штаб на Беласица.
Победа: Т. Тодороски, Ѓорески (Атанасоски), Николоски, Глушески, Мечев, Л. Петрески, Црвески, Р. Ѓорѓиоски, З. Конески (Василески), Сусулески, Настески. Тренер: Методија Крстески – Каше.
Беласица: Истатов, Василев (М. Митев), И. Андреев, Дрвошанов, К. Секулов, Б. Митев, Н. Секулов, П. Андреев, Мавков, Георгиев (Стојков), Стојанов. Тренер: Митко Џртев.
