Ова 10. место за Победа на табелата од Втората фудбалска лига на Македонија според многумина прилепчани, добри познавачи на фудбалот, не е реален одраз на квалитетот на младиот прилепски тим. Според нив, тимот има вредност многу повисока, за пласман веднаш до најдобрите три-четири тима. Дека овие мислења имаат основа покажува статистиката по одиграните 11 есенски кола во врска со постигнатите голови. Според бројките, Победа со 19 гола е на делба на второто место со Македонија ЃП и Башкими, а само Арсими има гол повеќе – 20.
Тимот Победа не само што има одличен напад, туку го има моментно и најдобриот стрелец во Втората лига, Никола Талески. Ова 19-годишно момче постигна 10 гола, два повеќе од вториот Симеон Христов (Македонија ЃП) и три повеќе од Дарко Грозданоски (Кожуф) и Андреј Симевски (Саса). Еве како изгледа листата стрелци во Победа: 10 Никола Талески, 3 Давид Јошески,1 Дамјан Ангелковски, Давид Дебрешлиоски, Ивица Трајкоски, Христијан Кукески, Дарио Спиркоски, а уште еден гол е всушност автогол на противникот.
Следниот меч за продолжување во овој правец е Осогово – Победа во Кочани, в недела.
