Супер-лигата во ракомет за мажи се скратува од 16 на 12 тима, па затоа борбата за опстанок е до последното, 14. коло од плејаутот, закажано за утре (сабота), од 16 часот. Борбата е за првото и второто место за директен опстанок, бидејќи третото место води кон бараж-дуел со Радовиш второпласиран од Првата лига.
Три екипи имаат план за директен опстанок – Прилеп, Еурофарм Пелистер 2 и Куманово, а има место за две. Еве го распоредот: Во салата од СОУ „Ристе Ристески – Ричко“ во Прилеп е дербито Прилеп – Еурофарм Пелистер 2. Победникот е прв, поразениот може да падне трет. Затоа се очекува преполна сала во Прилеп. Сите што сакаат вакви мечеви, пожелно е совреме да влезат во салата. Што се однесува до Куманово, иако е на третото место, има шанси за искачување погоре, со оглед на тоа што е фаворит на гостувањето кај Мултиесенс во Скопје.
ТАБЕЛА: Еурофарм Пелистер 2 и Прилеп 33, Куманово 32, Мултиесенс 23, Вардар Н. 21, Голден арт 16, Скопје 6, Аеродром –11.
Од Супер-лигата директно отпаѓаат пет тима.
