Денешниот меч Победа (Прилеп) – Башкими (Куманово) од 16-финалето на Купот на Македонија започна со 13 минути задоцнување, поради оправдано доцнење на службата Брза помош, којашто имала интервенција токму во тоа време на некоја локација во Прилеп. Мечот заврши многу подоцна од планираното и поради прекинот од десетина минути околу 75. минута. Тогаш првиот помошен судија Горан Балески од Охрид имаше мало лизгање на теренот (дознаваме дека се работи за истегнати лигаменти на ногата, така што подоцна во прилепската болница му е укажана потребната помош и решен проблемот, тој се чувствувал добро), па до крајот него го замени четвртиот судија Кирил Смоквоски од Прилеп.

Што се однесува до играта, прволигашот од Куманово ја имаше иницијативата, но второлигашот парираше и во добар дел од мечот даде силен отпор. Практично се до овој прекин поради повредата на судијата, се дотогаш беше само 0:1, а веднаш потоа, во 76. минута падна вториот гол, па четири минути потоа третиот и уште две минути потоа четвртиот. Така, наместо реми или барем минимален пораз, Победа доживеа висок пораз од 0:4. Стрелци: Недим Хаџиќ во 25., Ресуљ Мемети во 76., Мухарем Мислими во 80. и Аворнуо Емануел во 82. минута.