Во Монтесилвано, Италија, петти ден е од Светското младинско шаховско првенство во машка и женска конкуренција, во три возрасни категории – до 14, до 16 и до 18 години. Меѓу петмина Македонци е 17-годишниот прилепчанец Никола Павлески (член на ШК Алкалоид од Скопје), во категоријата до 18 години. Павлески постигна уште една победа, успеа со црни фигури да го совлада Србинот Никола Лесковац. Ова беше 4. коло, а во претходните три кола нашиот шахист двапати загуби, еднаш победи. Денеска, во 5. коло, со бели фигури прилепчанецот игра против ФМ Габор Мартон Фолдес од Унгарија. На табелата Павлески со 2 поена е на 75. место, а Унгарецот Фолдес со 2 поени е на 64. место.
Другите македонски претставници се: ФМ Моника Жежовска од Скопје (женски до 18 години) со 2,5 поени на 40. место, Кристијан Кавазов од Гевгелија (до 16) со 1,5 поени на 113. место, Даниел Стеваноски од Скопје (до 14) со 1,5 поени на 97. место и Наде Смилевска од Битола (женски до 16) со 1 поен на 89. место.
Поддршка за нашите шахисти во Италија е велемајсторот Звонко Станојоски од Прилеп.
