За напаѓачот Игор Ѓорѓиев прилепската фудбалска јавност има слушнато многупати, но од вчера ќе се заинтересира уште повеќе. Тој го постигна единствениот гол за Победа во дуелот со Големо Коњари. Всушност, кавадарчанец го реши мечот во Прилеп. Тој е жител на Кавадарци, а има настапувано за Тиквеш, Росоман, Саса, пак Тиквеш, па Слога Виница, од каде се пресели во Победа. Има 27 години.
– Тежок меч. Многу шанси имавме, можевме да победиме и повисоко од 1:0, но гостинскиот голман Антонио Шемкоски спасуваше. Сепак, во 50. минута го постигнав победоносниот гол. Акцијата со Давид Јошески преку додавање со долга топка е уиграна на тренинзите. Убав гол. Сметам дека ударот мој беше силен и не можеше да се одбрани, Што се однесува до нашата мрежа, добро е што остана незатресена, а заслуга има одбраната предводена од голманот Дарко Тофилоски. Иако е највозрасен, многу вредно тренира и одлично одбрани, така што комплетно ни служи за пример како треба да се однесуваме сите во клубот. Оптимизмот во нашите редови е присутен и веруваме дека на крајот ќе бидеме високо над петте загрозени на табелата – рече Игор Ѓорѓиев.
Следен предизвик за Ѓорѓиев и за Победа е гостувањето на Детонит во Радовиш.
