Меѓу починатите во трагедијата во Кочани има спортисти. Еден од нив е 25-годишниот фудбалер на прволигашот Шкупи Андреј Лазаров, претходно играч во Хрватска, на Тиквеш, Работнички и други клубови. Во саботата настапи во дресот на Шкупи во Скопје, против битолски Пелистер, тим во кој одиграа прилепчаните Даниел Карчески и Јорданчо Наумоски.
„Брат мој, нашите фудбалски патишта ни се вкрстија на едно преубаво место. Другарството наше растеше се посилно и посилно, дружбите наши беа нераскинливи. Го пишувам ова и душата ми се раскинува. Ако имаше подобар начин да те испратам меѓу ангелите, беше вчерашната наша мала средба пред натпревар, кај што се смеевме за се и сешто, и ја договаравме нашата нова дружба. Почивај во мир, ќе останиш засекогаш во моето срце!“- напиша на Фејсбук, Карчески, додека Наумоски под објавеното видео има напишано: „Андреј Лазаров засекогаш со нас. Почивај во мир!“
Меѓу починатите се уште двајца спортисти, 18-годишниот фудбалер Дамјан Танески (Брегалница Штип) и 20-годишниот кошаркар Петар Ивановски (Баскет Дино Кочани).
