Денеска беше 18. коло од Втората лига на Македонија, нов тежок ден за најфудбалскиот град, Прилеп, при мечот Победа – Преспа. Тежок ден бидејќи се знае дека за сениорскиот тим на Победа настапуваат и младинци и кадети, а не сениори. Сите до еден се под знакот (Мл) што значи младинци или кадети. Најмалите беа со 16 години – Филип Петрески (роден на 8 август 2009), веднаш до него Гоце Кузманоски (19 март 2009), а со наполнети 17 години неодамна е Бруно Стефаноски (31 јануари 2009). Највозрасните се со по 21 година – Давид Дебрешлиоски (24 август 2004) и Марио Тасески (27 август 2004). За споредба, во Преспа најмалите се на 18 години – Трајче Кристијан (24 декември 2007), Зоран Чапанов (16 февруари 2007) и 19 години – Еранд Зиба (15 јануари 2007) и Туше Дарио Стојановски (12 јануари 2007), а највозрасен со 36 години – Пеце Наумовски (23 јуни 1989).
Имајќи ги предвид овие податоци, како и тешката, претешка состојба во ФК Победа, не можеше да се избегне и денеска поразот, 1:5 (1:2). Стрелци: Бојан Смилески во 22. м. (Победа) – Александар Поповски 8., Неџми Реџепи 17., Елмаз Емуш 54. и 73. Јасин Казимоски 77. (Преспа). Прилепските „деца“се бореа на теренот чесно докрај, даваа максимум и затоа од публиката, симпатизерите на клубот добиваат и натаму поддршка и при успех и при неуспех. Впрочем, на скалите кај старата болница пак дојде публика да гледа, иако беше казната за гледачи на трибините од Градскиот стадион „Гоце Делчев“. Ова за премладите прилепски фудбалери значи искуство. Многумина од нив имаат право да играат за младинската, некои дури и за кадетската екипа, а во тие категории минатиот викенд се постигнаа одлични резултати.
ДВАЈЦА СО КАПИТЕНСКАТА ЛЕНТА
Колку е тешко и одговорно да се биде во дресот на Победа и сега, да се носи и капитенската лента, се виде и на денешниот меч. Клубот Победа навистина е во најголемата криза, ама името било и останува светост за прилепчаните, за младите фудбалери. Во 77.минута гостите го дадоа последниот гол, а капитенот, еден од најдобрите играчи на теренот, не можеше да издржи, да поднесе таков пораз и се одлучи да ја предаде капитенската лента на соиграч – Кристи Крајоски. Така, на овој меч двајца ја носеа капитенската лента на Победа.
Давид Дебрешлиоски одигра до 82.минута, кога му го отстапи местото на Стефан Наскоски.
РЕЗУЛТАТИ 18. КОЛО: Победа – Преспа 1:5, Тетекс – Брегалница Ш. 0:0, Вардар Н. – Новаци 1:2, Кожуф – Саса 2:2, Осогово – Охрид 1:0, Шкендија А. – Скопје 1:2, Слога В. – Детонит 0:4. Утре, среда, 4 март,14 часот: Беласица – Големо Коњари.
ТАБЕЛА: Охрид 40, Шкендија А. 39, Скопје 38, Брегалница Ш. 37, Новаци 36, Детонит 35, Осогово 33, Беласица 31, Кожуф 26, Саса и Тетекс по 21, Преспа и Вардар Н. по 12, Победа 11, Слога В. 8, Големо Коњари 4.
СЛЕДНО 19. КОЛО (сабота, 7 март, 14 часот): Охрид – Победа, Слога В. – Тетекс, Детонит – Беласица, Скопје – Осогово, Преспа – Кожуф, Саса – Вардар Н. Недела, 8 март, 14 часот: Големо Коњари – Шкендија А.
