Само еден гол е постигнат во Прилеп, на мечот Победа – Саса (1:0), но многу вреден. Со него прилепскиот тим ем постигна победа, освои три бода, а има и прогрес на табелата од 13 кон 12. место, а и што е многу важно – се оддалечи од бараж-позицијата за 8 бода. Тој вреден гол го даде Филип Димоски во 47. минута, откако беше проигран од Јасин Казимоски, кој претходно ја одзеде топката и веднаш ја додаде. При акцијата Димоски биеше неодбранливо во левиот голмански агол.
Мечот беше динамичен, борбен. И домашните и гостите имаа свои периоди од играта, а тоа што немаше повеќе голови заслужни се цврстите одбрани, предводени од голманите И. Николоски и Стојковски. Гостите најзрелата можност ја имаа пред крајот, кога во шанса беше Кристијан Таневски, но во последен миг спаси Димитар Шаркоски, што може да се види на фотографијата.
Во секој случај, публиката задоволна го напушти прилепскиот стадион затоа што Победа совлада силен ривал, а со триумфот оди кон целта – средината од табелата.
За одбележување е присуството на навивачката група „Мајмуни“. Тие по извесна пауза повторно се појавија на трибината, бодрејќи ги своите миленици.
ПОБЕДА: И. Николоски, Ивчески, Казимоски, А. Петрески (75. М. Талески), Исмаил (65. Љумовиќ), Д. Шаркоски, П. Петроски, Ф. Димоски (90. Арифи), Кофиловски, Каба, Богевски (90. Крајоски). Тренер: Стојанче Дунимаглоски.
САСА: Стојковски, Фидановски (70. Аџијев), Алиев, Таневски, Бекир (80. Ајрули), Алексовски, Ќосески (85. Митревски), М. Димоски, Мичковски, Голубов (85. Коловски), Симевски. Тренер: Горан Гоцевски.
РЕЗУЛТАТИ 25. КОЛО: Победа – Саса 1:0, Новаци – Вардар Н. 2:0, Башкими – Вардарски 2:0, Охрид – Осогово 2:2, Беласица – Скопје 1:0, Арсими – Кожуф 1:0, Македонија ЃП – Детонит 1:0, Борец – Брегалница 0:1.
ТАБЕЛА: Македонија ЃП и Башкими 56, Арсими 54, Брегалница 51, Беласица 38, Детонит и Охрид 36, Скопје 34, Кожуф и Саса 32, Новаци 28, Победа и Вардар Н. 27, Осогово 19, Борец 13, Вардарски 11.
СЛЕДНО 26. КОЛО (26 април во 16 часот): Вардарски – Победа, Вардар Н. – Борец, Брегалница – Македонија ЃП, Детонит – Арсими, Кожуф – Беласица, Скопје – Охрид, Осогово – Башкими, Саса – Новаци.
