Триесетишестгодишниот Филип Мирчески е назначен за тренер, шеф на Стручниот штаб на Победа, по оставките на Стојанче Дунимаглоски и тренерот на голманите Дејан Кебакоски. Станува збор за некогашен капитен на Победа и 11 Октомври, прогласуван двапати за спортист на Прилеп, подоцна тренер во младинската екипа на Победа (стана шампион на Македонија во сезоната 2021/22), а есента 2023 беше и шеф на Стручниот штаб во сениорскиот второлигашки тим, но и тренер којшто ја водеше генерацијата во Младинската лига на европските шампиони. Исто така важно е да се знае за него дека беше и директор на Младинската академија во Победа, а ја има и приватната Фудбалска школа Вондеркидс.
Мирчески попладнево го одржува тренингот со сениорскиот тим на Победа, тим којшто е во голема есенска криза – со само 1 бод од 5 меча. Сепак, нема предавање, многу е рано за такво нешто, а на многумина им е совршено јасно дека ова што и се случува на Победа не е реално, далеку е од вистинските можности, под услов клубот да се среди, условите да се подобрат, играчите да се подготват… Нов оптимизам има по одржаниот денешен состанок на водечките луѓе со тренерот и играчите. Дознаваме дека клубот е во очекување на финансиска помош, нешто што битно ќе ја подобри состојбата, така што и оптимизмот е врз реална основа. На денешниот тренинг сериозно се подготвува и голманот Дарко Тофилоски, чиешто враќање на голот се најавува подолго време, а можно е да се случи в сабота.
Мечот в сабота е против Големо Коњари, меч закажан за 15 часот.
