На 4 октомври 2025 во спортската сала на СОУ „Ристе Ристески – Ричко“ во Прилеп, ќе се одржи 15-тото издание на Меѓународниот турнир во џудо „Прилеп град херој 2025 Цевитана куп“. Турнирот е во организација на Џудо клубот „Сеишин“ од Прилеп со поддршка на Џудо федерацијата на Македонија. Истиот е за возрасните категории: деца, помлади пионери и пионери во машка и женска конкуренција кои ќе се натпреваруваат во околу 40 тежински категории. Согласно досега пријавените клубови се очекуваат натпреварувачи од 8 држави и тоа: Грција, Србија, Црна Гора, Албанија, Косово, Бугарија, Турција и Англија, покрај домашните клубови од Македонија. Но пријавувањето е во тек и според најавите и оваа година во Прилеп ќе пристигнат над 300 натпреварувачи, која бројка ќе се знае веќе на 2 октомври. И оваа година повторно има клубови од нови две држави кои за прв пат доаѓаат во Прилеп – Англија и Турција, со што турнирот го зголемува бројот на земји учеснички.
Традиционално на еден ден пред почетокот на турнирот т.е. на 3 октомври, прилепскиот клуб ќе ја одржи редовната прес-конференција за јавноста и медиумите со цел да се соопштат сите детали за настанот а ќе се претстават дел од гостите, помагателите и спонзорите за овој настан. Потсетуваме – претседател на ЏФМ е прилепчанецот Владимир Трпаноски, а прилепчани има и селектори на повеќе возрасни категории.
Затоа се покануваат сите љубители на боречките вештини да земат присуство и да ги проследат борбите в сабота со почеток во 10 часот. Влезот е слободен.
