Младиот 17-годишен прилепчанец Никола Павлески постигна нов успех – реми на Европското првенство за шахисти до 18 години, во Будва (Црна Гора). И ремито е успех затоа што го постигна против Дениел Сафаров (Грузија) со висок рејтинг од 2.280 и стартна позиција 36. За споредба, Павлески е со рејтинг 1.917 и стартна позиција 85. Ова беше 3. коло, а во претходното 2. коло прилепчанчето (член на ШК Алкалоид, Скопје) го совлада Артом Андриенко (Украина) со рејтинг 2.201 и стартна позиција 54. Денеска, во 4. коло, Павлески игра со ФМ Аку Салонен (Финска), којшто има рејтинг 2.250 и стартна позиција 46.
Во истата категорија до 18 години Македонија ја престатвува и ФМ Антон Златков (и тој член на ШК Алкалоид од Скопје), со рејтинг 2.350 и стартна позиција 23. Тој изваде реми во 3. коло против Вилиус Руткис (Литванија) – рејтинг 2.183 и стартна позиција 56. Денеска, во 4. коло, Златков игра со Вилијам Александер Олсен (Норвешка), рејтинг 2.152 и стартна позиција 58.
Интересна е и женската категорија до 16 години, каде учесник е прилепчанката Теодора Ѓорѓиеска (ШК Прилеп) – рејтинг 1.463 и стартна позиција 83. која досега има освоено половина поен, со реми против Амбре Торе-Јосо (Монако) – рејтинг 1.739 и стартна позиција 62. Во денешното 4. коло Ѓорѓиеска игра против Инбал Гавриел (Израел) – рејтинг 1.758 и стартна позиција 58.
Во машката група до 18 години со максимални 3 поени водат ФМ Ваке Сукиасјан (Ерменија) и ИМ Филип Маголд (Романија), а во женската до 16 години три девојки имаат по 3 поени – Лусија Стол (Франција), ФМ Алексија-Андреа Лордаче (Романија) и Амалие Задрапова (Чешка).
