На Тринаесеттиот турнир во мал фудбал „Свети Никола“ во Прилеп, чиј почеток е денеска, мнозинството учесници имаат имиња на компании, а екипата од Житоше е според Фудбалскиот клуб Братство 07. Така е затоа што екипата е составена токму од фудбалерите коишто настапуваат за клубот, учесник во Општинската Б – лига на ОФС Прилеп.
– И пред десетина години учествувавме на овој турнир. Имавме и сениорска и пионерска екипа. Таква желба беше и сега, што сметам дека се остварува – вели Музафер Алиоски, тренерот.
Конкретно, за сениорската екипа, има информации дека специјално се подготвува со тренинзи во Балон – салата во Прилеп. По пријавувањето, има одржано четири тренинзи таму. Составена е не само од домашни играчи од Житоше, ами и од жители на други ближни места во регионот: Саждево, Борино, Дебреште, Лажани…
– Иако вложуваме максимум во тренинзите, поентата за учеството на турнирот е дружењето, средбите, комуникацијата со другите. Тие екипи што имаат финансиери, компании, можеби повеќе одат кон резултат, но ние кои носиме име клупско, иако сме помогнати од компанија, не сме оптоварени премногу со резултатите, ами со дружбата. Сакаме се да биде убаво, позитивно, многу публика, да нема повреди – нагласува Алиоски.
Братство 07 се во Г – групата, заедно со Пролетер и Давид Коруноски (двете од Прилеп) и Инекс Олгица (Охрид). За Братство 07 пријавени се следниве играчи: Онур Саитоски – голман, Беар Емини, Берат Сулејмани, Армин Исеини, Елмер Османи, Илхан Ахмеди, Мерис Шкриељ, Џенан Идризовиќ, Алиџан Фазлиоски и Абил Емини.
