Денешниов е десетти ден е од Светското младинско шаховско првенство во Монтесилвано, Италија, каде во разни возрасни категории учествуваат петмина млади шахисти од Македонија. Меѓу нив, во категоријата до 18 години, е 17-годишниот прилепчанец Никола Павлески. Тој во 8. коло со црни фигури направи подвиг, го совлада Црногорецот Михаило Пусара. Борбата беше тешка и долга, пет и пол часа. Подвиг е затоа што Павлески има рејтинг 1971, а Црногорецот е со 2167 меѓународни поени. Така, нашиот претставник сега има 4 поени (три пораза, две реми и три победи) и на табелата е на 66. место. Денеска (среда) од 15 часот е 9. коло, во кое Павлески со бели фигури ја игра партијата со Гркот, ФМ Стефанос Казанѕоглу. И Казанѕоглу има ист број поени – 4, но е нешто повисоко на табелата, на 58. место.
Другите македонски претставници: ФМ Моника Жежовска од Скопје (женски до 18 години) со 4,5 поени на 38. место, Кристијан Кавазов од Гевгелија (до 16) со 4 поени на 90. место, Даниел Стеваноски од Скопје (до 14) со 3,5 поени на 96. место и Наде Смилевска од Битола (женски до 16) со 2,5 поени на 95. место.
