Во Монтесилвано, Италија, шести ден е од Светското младинско шаховско првенство во машка и женска конкуренција, во три возрасни категории – до 14, до 16 и до 18 години. Меѓу петмина Македонци е 17-годишниот прилепчанец Никола Павлески (член на ШК Алкалоид од Скопје), во категоријата до 18 години. Павлески во 5. коло имаше 5-часовна борба против ривал со титула (фидемајстор) ФМ Габор Мартон Фолдес од Унгарија, против кого изваде реми и го подели поенот. Така, прилепчанецот сега е на 75. место со 2,5 поена, бидејќи претходно двапати загуби и двапати победи. Денеска од 15 часот, во 6. коло, со црни фигури игра против Мигуел Ангел Гарсија Лопез од Мексико. Тој се наоѓа на 70. место со 2,5 поена.
Другите македонски претставници: ФМ Моника Жежовска од Скопје (женски до 18 години) со 3,5 поени е на 43. место, Кристијан Кавазов од Гевгелија (до 16) со 1,5 поени на 124. место, Даниел Стеваноски од Скопје (до 14) со 2,5 поени на 83. место и Наде Смилевска од Битола (женски до 16) со 1 поен на 99. место.
