В недела (17:30 часот) се најавуваат голем број гледачи на Градскиот стадион „Гоце Делчев“ во Прилеп, иако во тој термин не игра прилепскиот второлигаш Победа, туку прволигашот Брера од Струмица и австрискиот клуб Фав АЦ од Виена. Прилепчаните ја користат можноста не само да гледаат пријателски меѓународен фудбалски меч, ами воедно да го искажат својот револт поради фактот што наместо Победа морало да се бара замена во Брера. Всушност, австрискиот клуб понудил пријателски меч со Победа, кој е одбиен, бидејќи прилепскиот тим не е почнат со тренинзи, па затоа за ривал е повикана Брера. Значи, никој нема ништо против тоа да ја гледа Брера, туку напротив прилепчаните премногу сакаат фудбал и со задоволство ќе го гледаат овој наш прволигаш преводен од Панче Стојанов во дуел со австрискиот клуб каде тренер е прилепчанецот Илчо Наумоски, меѓутоа разочараноста и револтот се токму поради состојбата во Победа. Клубот што премногу им значи е далеку од тоа ниво што го заслужува. Според наши сознанија, овие симпатизери бараат што побрзо да има прес-конференција за да се извести јавноста во врска со сегашната состојба во Победа, што всушност се случува, кои се проблемите, што се прави за тие да се надминат.
За в недела е најавено присуство на голем број фудбалски симпатизери, навивачи, некогашни фудбалери, тренери, инволвирани по разни основи во фудбалот, едноставно – луѓе на кои при срце им била и засекогаш ќе им биде Победа.
